अब देखि ग्यास सिलिन्डर निःशुल्क साटिने

काठमाडौं, ३१ असार (कास)– नाकाबन्दीका बेला उपभोक्ताले काठमाडौं उपत्यका बाहिरबाट ल्याएका ग्यास सिलिन्डर काठमाडौंमै साट्न पाउने भएका छन् । नेपाल एलपी ग्यास उद्योग संघले साउन १ गतेदेखि उपत्यकाभित्रै निःशुल्क सिलिन्डर साट्न पाउने व्यवस्था गर्दै छ ।  बिहीबार बसेको संघको बैठकले उपत्यका बाहिरका सिलिन्डर काठमाडौंका विभिन्न ग्यास गोदामबाट साट्ने व्यवस्था गर्ने निर्णय गरेको हो ।

संघका अध्यक्ष शिवप्रसाद घिमिरेले ग्यास उद्योगले काठमाडौं उपत्यकाभित्र मार्केटिङ नगरेका  तथा आधिकारिक विक्रेता नभएका सबै ग्यास सिलिन्डर साउन १ देखि ७ गतेसम्म साट्न व्यवस्था मिलाइएको जानकारी दिए ।

“विभिन्न ग्यास विक्रेता तथा डिपोले सिलिन्डर साट्नका लागि अनावश्यक रकम लिइरहेको गुनासो उपभोक्ताबाट आइरहेको छ,” उनले कारोबारसँग भने, “अब उपभोक्ताले कुनै पनि शुल्क नतिरी सहजै साट्न पाउनेछन् ।” आपूर्ति मन्त्रालय र संसद्को उद्योग वाणिज्य तथा उपभोक्ता समितिले काठमाडांै उपत्यका बाहिरका ग्यास सिलिन्डर साट्ने व्यवस्था गर्न यसअघि उद्योगलाई निर्देशन दिएका थिए । “काठमाडांै उपत्यकामा बिक्री वितरण हुने २६ वटा सिलिन्डरबाहेक अन्य  ग्यास सिलिन्डर साट्न पाइन्छ,” घिमिरेले भने,  “हामीले काठमाडौं उपत्यका बाहिरबाट ल्याइएको सिलिन्डर लिएर उपत्यकाभित्र चल्ने सिलिन्डर उपभोक्तालाई  दिन्छौं ।”

काठमाडौं उपत्यकाभित्र आधिकारिक ग्यास विक्रेता रहेका ग्यास सिलिन्डर भने नसाट्ने भएको छ । कुन ग्यास सिलिन्डर कहाँ साट्ने भन्ने सूचना प्रकाशित गरिने भएको छ । नाकाबन्दीले ग्यास अभाव भएका बेला उपभोक्ताले चर्काे मूल्य तिरेर वीरगन्ज, भैरहवा, विराटनगर र नेपालगन्जलगायत क्षेत्रबाट ग्यास सिलिन्डर ल्याउने गरेका थिए । उपभोक्ताले सिलिन्डर सहितको मूल्य १० हजार रुपैयाँसम्म तिरेका थिए । उपत्यका बाहिरका ग्यास सिलिन्डर कति भित्रिएका छन्  भन्ने यकिन तथ्यांक छैन । ती ग्यास सिलिन्डर काठमाडौं बजारमा नपाइने भएकाले उपभोक्ता चर्काे मूल्य तिरेर साट्न बाध्य छन् । ग्यास विक्रेताले ग्यास सिलिन्डर साट्नका लागि  ३ सयदेखि १५ सय रुपैयाँसम्म उपभोक्तासँग लिने गरेका छन् ।