रसुवामा आन्तरीक र बाहय पर्यटक आगमन बढ्यो

अनु आचार्य
नेपालको तेस्रो पर्यटकीय गन्तव्यस्थलका रूपमा रहेको लाङटाङ तथा गोसाइँकुण्ड क्षेत्रमा हिमाली दृश्यावलोकन गर्न आउने पर्यटक संख्या बढेको छ । हिमाली क्षेत्रको पदयात्राका लागि सिजन सुरु भएसँगै दैनिक आन्तरिक तथा बाह्य पर्यटक आगमन वृद्धि भएको हो ।तीन महिनामा भित्रिए १६ सय पर्यटक
लामटाङ राष्ट्रिय निकुञ्जका प्रमुख संरक्षण अधिकृत हरिभद्र आचार्यका अनुसार आव ०७३÷७४ को पहिलो तीन महिनामा १ हजार ६ सय ८० जना पर्यटक रसुवा भित्रिएका छन् । सार्क राष्ट्रबाट ७ जना र अन्य राष्ट्रबाट १ हजार ६ सय ७३ जना पर्यटक रसुवा भित्रिएका हुन् ।
सार्क राष्ट्रका पर्यटकबाट १० हजार ५ सय र अन्य मुलुकका पर्यटकबाट ५० लाख १९ हजार रुपैयाँ राजस्व संकलन भएको निकुञ्जका प्रमुख संरक्षण अधिकृत आचार्यले जानकारी बताए ।

पर्यटक आगमन बढ्नुका कारण
भूकम्पको प्रभाव घट्दै गएको, पदमार्ग सुधार भएको र होटेल पुनर्निर्माण भैसकेकाले आगमन वृद्धि भएको उनको भनाइ छ । यस्तै अघिल्लो आर्थिक वर्षको पहिलो तीन महिनामा ६ सय २३ जना पर्यटक रसुवा भित्रिएका थिए ।
लाङटाङ राष्ट्रिय निकुञ्जमा प्रवेश गर्ने ६ प्रवेशद्वारमध्ये हाल ४ वटा मात्र सञ्चालनमा छन् । असोज, कात्तिक पर्यटकको आगमन हुने मुख्य याम भएकाले अहिले दैनिक ५० भन्दा बढी पर्यटक हिमाली क्षेत्रमा आउन थालेको प्रमुख संरक्षण अधिकृत हरिभद्र आचार्यको भनाइ छ ।
भूकम्प जानुअघि तिम्बुपोस्ट, सेर्माथाङ पोस्ट, कुटुम्साङ पोस्ट, धुन्चे पोस्ट, लाङटाङ पोस्ट र तेम्पाथाङ पोस्टबाट पर्यटक निकुञ्ज प्रवेश गर्ने भए पनि लाङटाङ र तेम्पाथाङ पोष्टमा भूकम्पले पूर्ण क्षति पु-याएको थियो ।
तेम्पाथाङ पोस्टको भवन निर्माण भइरहेको र लाङटाङको घोडेतवेलामा पोस्ट निर्माणका लागि विभागमा प्रस्ताव पठाइएको निकुञ्जले जनाएको छ ।
३३ हजारभन्दा बढी स्वदेशी पर्यटक
यस्तै आव ०७३-७४ को साउनदेखि असोज मसान्तसम्म ३३ हजारभन्दा बढी स्वदेशी पर्यटक रसुवा भित्रिएका छन् । लाङटाङ, गोसाइकुण्ड र तामाङ सम्पदा मार्गमा अध्ययन अवलोकनका लागि सो संख्यामा स्वदेशी पर्यटक रसुवा भित्रिएका हुन् । दैनिक १० देखि १५ जना गोसाइँकुण्ड, लाङटाङ, रसुवागढी, गत्लाङलगायतका क्षेत्रमा जाने गरेको लाङटाङ राष्ट्रिय निकुञ्जले जनाएको छ ।
स्वदेशी पर्यटकको तथ्यांक राखिँदैन
हिमाली राष्ट्रिय निकुञ्जमा स्वदेशी पर्यटकबाट शुल्क नलिने हुँदा तथ्यांक राख्ने नगरिएकाले यति नै संख्यामा स्वदेशी पर्यटक भित्रिए भन्न नसकिने निकुञ्जका प्रमुख संरक्षण अधिकृत आचार्यले बताए ।
उनले भने, ‘विदेशी पर्यटकको तथ्यांक राखेका हुन्छौँ, तर स्वदेशी पर्यटक कति आए भन्ने हामीसँग तथ्यांक हुँदैन ।’ नेपालको तेस्रो ठूलो पर्यटकीय गन्तव्य मानिएको लाङटाङ क्षेत्रमा पर्यटक आगमन बढ्दै गएको छ । भूकम्पपछि असामान्य भएको स्थानीयको दैनिकी पनि अहिले सामान्य बन्दै पर्यटन प्रवद्र्धनमा केन्द्रित हुँदै गएको छ ।
भूकम्पअघि वार्षिक १५ हजार पर्यटकले अवलोकन गर्ने लाङटाङ क्षेत्रमा अहिले पर्यटकहरूको आवागमन बढ्न थालेको छ ।
होटल, लज निर्माण भइसके
भूकम्पपछि पुनर्निर्माणअन्तर्गत लाङटाङ तथा गोसाइँकुण्ड र तामाङ सम्पदा मार्गमा पर्यटकीय होटेल तथा लज व्यवस्थापन भइसकेकाले पाहुनालाई खानपिन र बसोबासमा कुनै समस्या नआउने व्यवसायीले बताएका छन् । रसुवा भित्रने पर्यटकमा नेदरल्यान्ड, इजरायल, जापान, फ्रान्सलगायत मुलुकका नागारिक हुने गर्छन् ।
प्रमुख पर्यटकीय स्थल
स्थानीय तामाङ कला र संस्कृति, निकुञ्ज क्षेत्रभित्रका जैविक विविधता, सिमसार क्षेत्रमा सूचीकृत गोसाइँकुण्ड, तातोपानी, गतलाङ, बृद्धिम होमस्टे, रसुवागढी तथा तामाङ सम्पदा मार्गलगायतका विभिन्न क्षेत्र पर्यटकका लागि प्रमुख आर्कषणको केन्द्र रहेका छन् ।/नयाँ पत्रिका