एक लाख रुपैयाँ हस्तान्तरण गर्न वनमन्त्री चढे डेढ लाखको हेलिकोप्टर

२७ पुस, काठमाडौं । ताप्लेजुङमा हत्या गरिएका वन रक्षक गणेशबहादुर शाहीका परिवारलाई जाजरकोटमा एक लाख रुपैयाँ हस्तान्तरण गर्न वनमन्त्री शंकर भण्डारीले सहयोग रकमभन्दा बढी खर्चेर मंगलबार सेनाको हेलिकोप्टर प्रयोग गरेका छन् ।

मन्त्री भण्डारी, वन विभागका महानिर्देशक कृष्णप्रसाद आचार्य, फरेष्ट टेक्निसियन्स् एशोसिएशन अफ नेपाल (नेफ्टा) का महासचिव प्रेम सापकोटालगायत शाहीका परिवारलाई भेट्न र सहयोग रकम हस्तान्तरण गर्न नेपाली सेनाको हेलिकोप्टर लिएर मंगलवार जाजरकोटको दसेरा गाविस–८ गएका हुन् ।
विहान करिब ९ बजे सेनाको पाँच सिटे हेलिकोप्टर लिएर गएको मन्त्री भण्डारीको टोली साँझ पौने पाँच बजे मन्त्रालय फर्किएको मन्त्रालय उच्च स्रोतले बतायो । ‘हेलिकोप्टर प्रयोगमा डेढ लाख रुपैयाँ भन्दा बढी खर्च भएको छ,’ स्रोतले भन्यो ।

मन्त्रालयका सहायक प्रवक्ता यज्ञनाथ दाहालले मन्त्री भण्डारी र महानिर्देशक आचार्यलगायतको टोलीले मंगलवार मृतक शाहीका परिवार वसोवास गरेको जाजरकोट पुगेर संवेदना र सहानुभूति प्रकट गर्दै एक लाख रुपैयाँ हस्तान्तरण गरेको विज्ञप्तिमार्फत् जनाएका छन् ।

महानिर्देशक आचार्यले सेनालाई आग्रह गरिए अनुसार हेलिकोप्टर उपलव्ध भएको र परिवारलाई समवेदना एवं सहयोग रकम दिएर काठमाडौं फर्किएको बताए । आचार्यका अनुसार मन्त्री भण्डारीले आफ्नै तलबबाट एक लाख रुपैयाँ परिवारलाई उपलव्ध गराएका हुन् ।

सेनाका प्रवक्ता ताराबहादुर कार्कीले मन्त्रालयको आग्रह अनुसार आफूहरुले प्रक्रिया पुर्‍याएर हेलिकोप्टर उपलव्ध गराएको जानकारी दिए । ‘कुन काममा प्रयोग भएको हो त्यस अनुसार शुल्कको कुरा आउँछ,’ कार्कीले भने ।

मन्त्री भण्डारीले शाहीकी श्रीमतीलाई करार नियुक्तिको पत्रसमेत हस्तान्तरण गरेका छन् । शाहीको ताप्लेजुङ खोक्लिङ–८ को एक सामुदायिक वनको साधारणसभामा भाग लिन खटिएको बेला पुस १७ को बिहान खुकुरी प्रहार गरी हत्या भएको थियो । उनलाई गत बिहीबारको मन्त्रीपरिषदले पहिलो वन संरक्षण सहीद घोषणा गर्दै परिवारलाई १० लाख रुपैयाँ दिने निर्णय गरेको थियो ।


Facebook Comment