यी हुन् बाहुबलीका रेर्कडहरु

सुशील पौडेल,वैशाख २९, २०७४- विश्वमा फिल्म बजार बढ्दो छ । बढ्दो व्यापारकै कारण फिल्मको विषयवस्तु समेत सिर्जनात्मक कम, बिकाउ ज्यादा हुँदै गइरहेको आरोप पनि फिल्मकर्मीले खेप्दै आएका छन् । गत साता रिलिज भएको भारतीय फिल्म ‘बाहुबली २’ भने सिर्जनात्मक हिसाबले जति चर्चा भएको छ, त्योभन्दा बढी कमाइका रेकर्ड राखेर भाग्यशाली साबित भइरहेको छ ।

एसएस राजामौली निर्देशित ‘बाहुबली २’ ले यतिबेला विश्वव्यापी रूपमा दस दिनमा एक हजार करोड भारु कमाइ गरी नयाँ रेकर्ड कायम गरेको छ । यसअघि कुनै पनि भारतीय फिल्मले यति धेरै कमाइ गर्न सकेका थिएनन् । त्यसो त ‘बाहुबली २’ ले पहिले नै विभिन्न शीर्षकमा बनेका रेकर्डलाई समेत भत्काएर नयाँ अंक स्थापित गरिदिएको छ । स्वदेशमा पनि नौ दिनको सर्वाधिक छिटो समयमा ३ सय करोड भारु कमाइ गरी नयाँ रेकर्ड राखिदियो ।

प्रभास, अनुष्का शेट्टी, राणा दग्गुबाती, तमन्ना भाटिया, रम्या कृष्णन, सत्यराजलगायतको मुख्य भूमिका रहेको तेलुगु फिल्म ‘बाहुबली २’ लाई अन्य तीन भाषामा पनि डब गरी रिलिज गरिएको थियो ।

अमेरिकाका ५० आइम्याक्स स्क्रिनमा रिलिज गरिएको ‘बाहुबली २’ एक सय करोड भारु कमाइ गर्ने पहिलो हिन्दी फिल्म बन्न सफल भएको छ । यसअघि उक्त रेकर्ड आमिर खान अभिनीत पछिल्लो फिल्म ‘दंगल’ का नाममा थियो । जुन फिल्मले ८० करोड भारु कमाइ गर्न सफल भएको थियो । ‘बाहुबली २’ ले कमाइमा आमिरकै दुई फिल्म ‘पीके’ र ‘दंगल’ ले बनाएका अधिकांश रेकर्डलाई भत्काएको छ ।

बलिउडमा अधिकांश ठूला फिल्म इद, क्रिसमस वा तिहार जस्ता ठूला चाडमा बिदा खाने गरी रिलिज गरिन्छ । यस्तोमा प्राय: सलमान खान, शाहरुख खान र आमिर खानकै हालीमुहाली चल्ने गर्छ । तर ‘बाहुबली २’ बिना बिदाको साता रिलिज भएरै पहिलो साताका हरेक दिन सोल्डआउट व्यापार गर्न सफल रह्यो । क्षेत्रीय भाषा र क्षेत्रीय कलाकार भएको ‘बाहुबली २’ को बाढीमा बलिउड फिल्म नै पनि बगाइए ।

‘बाहुबली’ का दुई भागलाई चार सय ५० करोड भारुमा बनाइएको थियो । जसमा पहिलो भागले नै वल्र्डवाइड रूपमा करिब साढे ६ सय करोड भारु कमाएको थियो । पछिल्लो समय भारतीय फिल्म व्यापारको ठूलो हिस्सा बनेर उदाएको चीनमा भने ‘बाहुबली २’ रिलिज हुन बाँकी नै छ । ‘दंगल’ ले चीनमा पनि अमेरिकाकै हाराहारीमा कलेक्सन गरेको थियो र आठ सय करोड भारुको लाइफटाइम कलेक्सन गर्न सफल भएको थियो ।

राजामौलीको फिल्मले भने सारा रेकर्ड तोड्न दुई साता पनि कुर्नु परेन । नेपालमै पनि पहिलो साता शतप्रतिशत अकुपेन्सीसहित व्यापार गरेको यस फिल्मले दोस्रो साता पनि मल्टिप्लेक्समा सोलो प्रदर्शनी पाएको छ । यहाँका व्यापार विज्ञहरू ‘बाहुबली २’ ले नेपालबाट मात्रै १२ करोडभन्दा बढी रुपैयाँको व्यापार गर्ने दाबी गर्छन् । जुन व्यापार हालसम्म कुनै विदेशीभाषी फिल्मले गर्न सकेका छैनन् ।

दोस्रो सातामा समेत ६० प्रतिशतभन्दा बढीको अकुपेन्सीसहित दर्शक बटुलिरहेको ‘बाहुबली २’ ले दोस्रो साताको आइतबार मात्रै ३४ करोड ५० लाख भारुको कलेक्सन गर्न सफल भएको छ । जुन दोस्रो सातामा हालसम्म भारतीय फिल्मले गरेको व्यापारको उच्च आँकडा पनि हो । यतिबेला फिल्म घरेलु बक्सअफिसमा चार सय करोडको नयाँ रेकर्डतर्फ उन्मुख छ ।

यसका लागि ‘बाहुबली २’ लाई आमिरकै दुई फिल्म ‘पीके’ र ‘दंगल’ ले क्रमश: बनाएका लाइफटाइफ कलेक्सन ३ सय ४१ करोड र ३ सय ८७ करोड भारुलाई समेत उछिनेर जानुपर्नेछ ।

राजसत्ता संघर्षका लागि दुई भाइबीचको संघर्ष र त्यसमा भाइ भारदारले खेल्ने षड्यन्त्रको माखेसाङ्लोमा उनिएको ‘बाहुबली २’ को पटकथालाई दर्शकले जति रचाएका छन्, फिल्ममा प्रयुक्त भिजुअल स्पेसल इफेक्ट्सको पनि तारिफ गरिएको छ । फेन्टासी लुक्समा ठूलो क्यानभास सिर्जना गर्न सक्ने निर्देशक राजामौलीको कल्पनाशीलतालाई भारतमा मात्र नभई विश्वभरका फिल्म समालोचकले समेत प्रशंसा गरेका छन् । साभार कान्तिपुर