नागढुङ्गा–मुग्लिन सडकखण्डमा २४ वटा नयाँ पुल बनाइने

काठमाडौं । नागढुङ्गा–मुग्लिन सडकखण्डमा २४ वटा नयाँ पुल निर्माण गरिने भएको छ । आगामी बैशाखबाट सडक विस्तार र सुधार गर्ने क्रममा सो सडकखण्डमा दुई–दुई लेनका पुलहरु निर्माण गर्न लागिएको हो ।

हाल सो सडक खण्डमा २७ पुल छन् । तीमध्ये तीन पुल नयाँ र फराकिला भएकाले त्यहाँ नयाँ पुल बनाउनुपर्ने छैन । पुराना पुल भएका स्थानमा भने तिनलाई मर्मत गर्नाका साथै नयाँ पुल पनि निर्माण गरिने नागढुङ्गा–मुग्लिन सडक आयोजनाका प्रमुख किरण कार्कीले जानकारी दिनुभयो ।

सबैभन्दा बढी सवारीसाधन भित्रिने र बाहिरिने नाका यही भएकाले सडक जत्तिकै चौडा पुल निर्माण भएपछि सवारी चाप व्यवस्थापन गर्न सजिलो हुने अपेक्षा गरिएको छ ।

यो खण्डको अधिकांश स्थानमा सडक झण्डै १० देखि ११ मिटरसम्म चौडा हुनेछ । ‘डेडिकेटेड’ दुई लेनमा चौडाइ सात मिटर हुनेछ भने त्यसमा दायाँ–बायाँ एक–एक मिटर गरी दुई मिटरमा ‘सल्जर’ निर्माण हुनेछ । यसले गर्दा सडक सुरक्षित हुने, गाडी बिग्रिएमा पार्किङ गर्न मिल्ने र अत्यावश्यक समयका लागि प्रयोग गर्न सकिनेछ ।

नागढुङ्गा–मुग्लिन सडक सुधार र विस्तारको लागि आगामी वैशाख १५ गतेबाट ठेक्का सम्झौता गर्ने तयारी छ । सो सडकखण्डमा तीन प्याकेजमा काम हुने छ । तीन प्याकेजमध्ये अहिले नागढुङ्गा–नौबिसे र नौबिसे–मलेखु सडक निर्माणका लागि ठेक्का आह्वान गरिएको नागढुङ्गा–नौबिसे सडक आयोजनाका प्रमुख कार्कीले जानकारी दिनुभयो ।

यससँगै अहिले परामर्शदाताको पनि छनौट गर्ने प्रक्रिया अघि बढाइएको छ । नागढुङ्गा–नौबिसे सडकको लम्बाई १२ किलोमिटर र नौबिसे–मलेखु सडकखण्ड साढे ४३ किलोमिटर छ । दुबै सडकको निर्माण सँगसँगै अघि बढाइने कार्कीले जानकारी दिनुभयो ।

नागढुङ्गाबाट–नौबिसे र नौबिसे–मलेखु दुई प्याकेजका लागि हाल ठेक्का प्रक्रिया सुरु भएको छ । यसका लागि नेपाली र अन्तर्राष्ट्रिय दुबै निर्माण कम्पनीले आवेदन हालेका छन् । नागढुङ्गा–नौबिसे सडक दुई वर्षमा र नौबिसे–मलेखु सडक तीन वर्षमा सम्पन्न गर्ने लक्ष्य छ ।