बागमती प्रदेशले भ्रमण वर्ष २०२४ घोषणा

हेटौंडा– बागमती प्रदेश सरकारले सन् २०२४ लाई प्रदेश भ्रमण वर्ष घोषणा गरेकोमा त्यसको औपचारिक कार्यान्वयन सुरु गरेको छ । सन् २०२४ को पहिलो दिन सोमबार बागमती प्रदेशको संस्कृति पर्यटन तथा सहकारीमन्त्री पुकार महर्जनले भ्रमण वर्षको औपचारिक शुभारम्भ गरेका हुन् ।

पत्रकार र मन्त्रालयका कर्मचारीबीच मन्त्री महर्जनले प्रदेशका केही पर्यटकीय स्थलको दृश्य समेटिएको भिडियो सामग्री देखाउँदै भ्रमण वर्ष २०२४ को औपचारिक शुभारम्भको घोषणा गरेका हुन् । सोही बीचमा एक शुभकामना सन्देश दिँदै मन्त्री महर्जनले बागमती प्रदेशमा विद्यमान पर्यटकीयस्थल र सम्भावनाको पहिचान, संरक्षण, सम्वर्द्धन र प्रचारप्रसार गरी पर्यटकीय गतिविधिलाई अभिवृद्धि गर्ने र सोको माध्यमबाट बागमती प्रदेशका पर्यटकीय स्थलमा पर्यटक आवागमन बढाउँदै अर्थतन्त्रलाई समेत गतिशील बनाउने उद्देश्यले भ्रमण वर्षको शुभारम्भ गरेको बताए ।

विश्व सम्पदा सूचीमा समेत समावेश भएका यस्ता ऐतिहासिक, सांस्कृतिक र प्राकृतिक सम्पदाहरूको उचित संरक्षण र प्रचारप्रसार गरी आगामी दिनमा धेरैभन्दा धेरै पर्यटकले भ्रमण तथा अवलोकन गर्ने वातावरणको निर्माण गर्नु भ्रमण वर्षको मूल उद्देश्य भएको मन्त्री महर्जनले बताए । विगतमा कोभिड–१९ को महामारी तथा अन्य विभिन्न कारणले सुस्ताएको पर्यटन क्षेत्रलाई पुन: जीवन्त र गतिशील बनाउन प्रदेश भ्रमण वर्ष कार्यान्वयनबाट सहयोग पुग्ने मन्त्रालयले विश्वास लिएको छ ।

‘भ्रमण वर्षले आनन्द, आतिथ्यता र एकताको साथै कला, संस्कृति, रहनसहन, परम्पराको संरक्षण, संवद्र्धन र पर्यटकीयस्थल र सम्भावनाको पहिचान, प्रचार–प्रसार र विकासमा योगदान पुर्‍याई बागमती प्रदेशलाई उत्कृष्ट पर्यटकीय गन्तव्य बनाउन सहयोगी बनोस् भन्ने शुभकामना व्यक्त गर्दछु,’ मन्त्री महर्जनले शुभकामना वक्तव्यमा भनेका छन् । भ्रमण वर्षमा विविध कार्यक्रम गर्नका लागि प्रदेश सरकारले एक करोड रुपैयाँ विनियोजन गरेकोमा त्यसलाई विविध कार्यक्रममा विभाजन गरी खर्च गरिने मन्त्रालयका सचिव गोविन्दप्रसाद रिजालले जानकारी दिए ।

भ्रमण वर्ष सफल बनाउन श्रव्यदृश्य सामग्री उत्पादन तथा विभिन्न सञ्चार माध्यमबाट प्रसारण गर्ने, प्रदेशका प्रमुख गन्तव्य समेटिएको पुस्तक तथा ब्रोसर तयार गर्ने, पर्यटन वर्षका विभिन्न टिसर्ट, ज्याकेट, स्टिकरलगायत प्रचार सामग्री उत्पादन तथा वितरण गर्ने, पर्यटकीय नक्सा तयार गर्नेलगायतका कार्यक्रम तय गरिएको मन्त्रालयले जनाएको छ ।