विदेशी आरोहीलाई सगरमाथा चढ्नुअघि अन्य हिमाल चढ्नैपर्ने नियम बनाऔं : कार्यकारी निर्देशक डा. रेग्मी

काठमाडौं । नेपाल पर्यटन बोर्डका कार्यकारी निर्देशक डा. धनञ्जय रेग्मीले सगरमाथा चढ्नुअघि नेपालमा रहेका ६ हजार र ७ हजार मिटरका अन्य हिमालहरुको आरोहण अनिवार्य गर्ने नियम बनाउन आवश्यक रहेको बताएका छन् ।

बिहीबार बसेको अन्तर्राष्ट्रिय सम्बन्ध र पर्यटन समितिको बैठकमा बोल्दै उनले यस्तो बताएका हुन् । उनले विदेशमा यति धेरै मान्छेलाई किन हिमाल चढ्न पठाएको भन्ने प्रश्न आउने गरेको भन्दै उनले हिमाल चढ्न आउने विदेशी पर्यटकहरुका लागि सो नियम बनाउनसके सुरक्षाका हिसावले पनि महत्वपूर्ण सावित हुने दाबी गरे ।

उनले यस्तो नियम बनाउनसके देशका अन्य क्षेत्र र हिमालहरुको पनि चर्चा र पर्यटकहरुलाई धेरै दिन राख्न सकिने बताए । उनले यस्तो नियमले देशका सबै हिमाली क्षेत्रको विकास गर्न सकिने बताए ।

‘हिमालको केसमा संसारभर जहाँ जुन इनरनेशनल फोरममा गएर कुरा गर्यो, यति धेरै मान्छेलाई किन हिमाल चढ्न पठाएको, चार, साढे चार सयलाई परमिट दिनुभएको छ । भनेको छ, कराएको छ । यसको उत्तर के त भनेर खोज्दै जाँदा हामी त हिमालै हिमालको देश हो’, उनले भने, ‘सगरमाथा चढ्नु भन्दाअघि ६ हजार मिटरका ३ वटा हिमाल चढ, सात हजार मिटरका दुई वटा चढ बल्ल ८ हजार मिटरका हिमाल चढ्न पाइन्छ भन्ने नियम बनाउनसके अपि, सैपाल मान्छे चढ्न जान्छन् र बल्ल सगरमाथा जान दिए एकातिर प्रेसर कम हुन्छ, अर्कोतिर सबै देशका हिमाली क्षेत्र विकास गर्न सकिन्छ । हिमालको संख्या १७९२ छ, १३१० का मात्रै नाम छन् । अरुका त नाम पनि छैनन् । अरु पनि खोजौँ, चढ्न दिऔँ, तर नियम बनाइदिऔँ न । सुरक्षाको लागि राम्रो छ, भन्ने विदेशीहरुले पनि भनिरहेका छन् ।’

कार्यकारी निर्देशक रेग्मीले नेपालमा हिमालको संख्या १ हजार ७ सय ९२ रहेको र नाम तोकिएका हिमालको संख्या १ हजार ३ सय १० मात्रै रहेको बताए । अन्य हिमालहरुको पनि अध्ययान गरी आरोहणको अनुमति दिनुपर्ने बताए ।